>>>سورة البقره <<< لقرائتها يوميا ..!!

سلامــ عليكمــ ورحمة الله وبركاتهــــ ..


بالفتره الاخيره ما شاء الله زادوا الناس اللي حابين يعرفون اكثر عن فضل قراءة سورة البقره ..

و الكل تشجع انه يقراها كل يوم ..

بس خايفين انه مايقدرون يواضبون عليها ..
.
.
.
انا مجربتها و راح اساعدكم و اشجعكم انه تقرونها و اي وحده تحس انها متكاسله تدخل و تكتب لنا رد وان شاء الله بتلاقي الكل يشجعها على هالشي..



راح نعتبرها مسابقه .. خلونا نبدي في اول40 يوم ..
وانا مسويه لكم جدول عشان تواضبون على القراءه وكل يوم تقرين فيه سورة البقره تحطين صح في الخانه اللي بالجدول تحت اليوم اللي بديتي فيه ..وتجين هنا بالموضوع وتقولين انك قريتيها طبعا مو من باب النفاق من باب (وفي ذالك فليتنافس المتنافسون)انا لوحدي وانتي لوحدك ماراح نتشجع لكن اذا حسينا ان في احد معانا بنتشجع وبندوم دون ملل


و مع تشجيع البنات و التنافس الشريف انه كل وحده تبي تكمل 40 يوم واهي تقراها كل يوم بدون لا تقطع ان شاء الله راح نقدر انه نخلي اكبر عدد يواضبون عليها ..


اللي حابه تشارك معاي بهالمسابقه ان شاء الله بتلاقي التشجيع وكل اللي تحتاجه عشان تكون عندها قراءة سورة البقره عاده كل يوم ما تنقطع ان شاء الله ..


هذا الملف فيه جدول تقدرون تعدلون الايام حسب اليوم اللي راح تبدون فيه .. و انا حاطه فيه 4 جداول كل جدول مقسم 40 يوم حسب الاسبوع ..


http://www.box.net/shared/vaz9986tc8


اول جدولين فيهم ايام الاسابيع كاتبتها

ثاني جدولين فاضين ..

رتبو الايام حسب اللي تبون تبدون ..

و الله يوفقكم دام انه عزمتوا على هالشي اللي اكيد قدره كبير و عظيم عند رب العالمين ..

.
.


بقولكم كم شغله تشجعكم اكثر على قراءة سورة البقره :

1- القرآن كله معجزه .. وسبحان الله فيه شفاء من كل داء .. فتخيلوا سورة البقره اللي الرسول عليه الصلاة والسلام وصى عليها و ذكر افضالها ..

2- بهالزمن زادوا الناس اللي مايخافون ربهم و انتشر السحر بشكل كبييييير فوق ما تتصورون خصوصا بين الحريم بالذات .. و زادت الاحقاد و الحسد .. و السحور والسوالف هذي كلها تجلب النجاسه للبيت و اعوذ بالله من الجن و المس والخرابيط هذي كلها ..

ممكن ناس وايد عليهم عين او حسد بس مايدرون او حتى مسحورين بعيد الشر عنكم جميعا بس ما يدرون .. سورة البقره بتخليكم تحافظون على نفسكم و اي شي من حسد و عين و سحر و مس و جن الله راح يبطله و يبعده عنكم ان شاء الله .. و هالشي معروووووف.. والرسول قال عليه السلام .(اقرؤ البقره فان اخدها بركه وتركها حسره ولا تستطيعها السحره ).

يعني مو بس اللي فيها تتداوي بسورة البقره .. لأ حتى اللي تبي تحمي نفسها من اي شر تقرا سورة البقره ما يقدرون عليها لا السحره الله يدمرهم و يرد اسحارهم عليهم .. و لا الحساد واعوذو بالله من الناس اللي ماتذكر الله .. ولا تنسون انها السورة التي لا يقدر عليها البطله السحره ..

3- اذا الانسان فيه ضيقه و مو مرتاح في حياته و نفسيته تعبانه اقرب شي يلجأ الى الله .. بالدعاء و الصلاة و قيام الليل .. والقرآن .. فمابالكم انه الانسان كل يوم يداوي نفسه بقراءة سورة البقره اللي معروفه انها تهدي النفس و تطمن الانسان و تريح قلبه ..


4- الله سبحانه و تعالى يحب العبد اللي يتقربله بعبادات يجتهد فيها غير العبادات المفروضه .. فقراءة سورة البقره تعتبر عباده .. و اهيا سورة طويله و كل وحده فينا حابه انها تقراها عشان تتقرب الى الله اكثر + يبعد عنها كل شر و مكروه باذن الله + تصون نفسها من داء العصر الهم والحزن و السحر و الحسد و العين و المس و الجن و الامراض النفسيه اللي ما لها علاج الا بالقرآن الكريم و اخلاص النيه لله و الدعاء له ..


5- تقدرون تقرونها في اي وقت من بعد صلاة الفجر لي صلاة الفجر الثانيه .. لانه يومنا ينتهي ونبدي في يوم يديد بعد صلاة الفجر.. يعني فرضا صليتي الفجر و نمتي.. صار الصبح رحتي الدوام رديتي تغديتي صليتي و بعدها اي وقت تقدرين تقرينها من اول ما تقومين ليييييين يأذن الفجر مره ثانيه .. .بس افضل القراءه بالثلث الاخير وقبل الفجر
ويفضل قراءة السورة كامله في قيام الليل في ركعتين او اربع.. كما ذكر الدكتور خالد الجبير.. في شريطه أسباب منسيه،،
.
.
وستلاحظ العديد من الأعراض كالــ التثاؤب والتجشؤ والكسل والخمول والارهاق وآلام فالجسم او كدمات فالساقين. وكلها دلالات على مفعول سورة البقره ضد العين او المس او السحر..

ومن تجد اعراض اخرى تسرد لنا هناااا.. وسنكون يد واحده نتعاون..
.
.






يالله مانبي اعذار و الله بيعوضكم بالوقت اللي هديتوا في دراستكم ساعه وحده بس و قريتوا فيها سورة البقره .. ان شاء الله بتلاحظون هالشي في امتحاناتكم ..


واللي عنده اي اشغال ثانيه بتلاحظ ان الله بيوفقها في حياتها و عيالها و كل شي


صدقوني ماتحس في هالشي الا اللي تجربها .. يمكن وايد مجربينها بس مايقولون لانه يخافون من العين وانه احد يحسدهم ومايقدرون يواضبون عليها ..









ومابي شي غير التوفيق من الله و دعاكم لي بظهر الغيب ..


والله يوفقكم و يسهل عليكم البدايه هذي و ان شاء الله بنتعاون كلنا


يالله منو المشاركين معانااا ؟

يالله بسم الله نبدي وفتحنا باب الاشتراك وفترة الاشتراك من اليوم ..

للأمانه منقول مع بعض التعديلاتــــ،، اتمنى اشوف مشاركاتكم وتفاعلكم

ولا تنسوني من دعواتكمـــ في ظهر الغيب
^
^
^
^ والي يبي يشارك يجي ويقول ولا تنسون .(سورة البقره تاتي يوم القيامه لصحبها كانه غمامه ).

مشكور اخوي
موضوع مررررررررررررررررره جميل
وبارك الله فيك